పున్నారావు మాష్టారు వ్రాసిన హైకూలు

ప్రజాశక్తి పత్రికలో ప్రచురింపబడిన పున్నారావు మాష్టారి హైకూలు

హైకూలు

Shareసవ్వడి డెస్క్ - పెద్దిపాగ పున్నారావు   Sun, 7 Aug 2011, IST  

సృష్టిలో అంతా సమమే

వ్యత్యాసమంతా

మన దృష్టి లోపమే

ఆడపిల్లకి అభద్రత

భూమ్మీదే కాదు

అమ్మ కడుపులో కూడా

పరువు పంజరంలో

ప్రేమ

జీవిత ఖైదీ

రణక్షేత్రంలో రాలిన

నెత్తుటి పూల కోసం

రెక్కలు విప్పిన రాబందులు

సామ్రాజ్యవాదులు

శ్రమ చెట్టుకు పూసిన

చెమట పూలన్నీ

నేలతల్లి శిగలోకే

నేల మీద రాలిన

చెమట చుక్కలన్నీ

పచ్చగా పండాయి

ఉత్పత్తికీ, వినియోగానికీ

శ్రమ

ఒక ఉత్ప్రేరకం

గుడిసెల్లో కిరోసిన్‌ దీపాలు

ప్రతి సాయంత్రం

చీకటిలో పోరాడుతూనే ఉన్నాయి

మార్కెట్లో సబ్బులకి

వొంటి మురికే వదిలేది

అంటరానితనం కాదు

మనుధర్మం నిరసిస్తూ

పల్లెలన్నీ

ఊరుకి దూరంగా నిలబడ్డాయి

భూగోళం మండుతోంది

పెరిగిన

ధర మంటల్లో

పందులు, ఎలుకలు

కోతులు, మనుషులు

ప్రయోగాలకు

కాదేది అనర్హం

సరళీకృత వ్యాపారంలో

మానవత్వం కూడా

ఒక ముడిసరుకే

మన అంతరంగాలు గీసిన

అడ్డగీతలే గదా!

ఈ కులం గోడలు

ప్రతి ఉదయం

సూరీడు నెత్తుటి ముద్దవుతాడు

మనుషుల్ని మేల్కొలపడానికి

డబ్బులు నిండిన

జేబుల మాటున

గుండె చప్పుడు

లయ తప్పుతోంది

వాన చినుకు కోసం

నేల తల్లి

నోరు తెరిచి

ఎదురు చూస్తోంది

కెరటానికి

అలుపుండదు

శిఖరమెప్పుడూ

శిరమొంచదు